Një mjet i tonazhit të rëndë është përfshirë nga flakët gjatë natës në zonën e Hidrovorit të Akërnisë, ku prej disa javësh po kryhen punime për ndërtimin e një resorti turistik.
Sipas të dhënave paraprake, një person ende i paidentifikuar dyshohet se ka hyrë në kantier dhe ka spërkatur me lëndë djegëse mjetet e rënda që ndodheshin aty. Për pasojë, një fadromë është djegur plotësisht, ndërsa mjete të tjera kanë pësuar dëmtime më të lehta materiale.
Në vendngjarje kanë ndërhyrë forcat zjarrfikëse, të cilat kanë bërë të mundur shuarjen e flakëve dhe shmangien e përhapjes së zjarrit në pjesën tjetër të kantierit.
Ndërkohë, policia ka nisur hetimet për zbardhjen e plotë të ngjarjes dhe identifikimin e autorit ose autorëve të dyshuar.
Paraprakisht, dyshohet se bëhet fjalë për një zjarrvënie të qëllimshme.
