Ministria për Evropën dhe Punët e Jashtme ka reaguar lidhur me situatën e shtetasit shqiptar Baki Goxhaj, i cili ndodhet në bordin e flotiljes “Sumud”, një mision humanitar ndërkombëtar që synon të thyejë bllokadën izraelite ndaj Gaza.
Përmes një deklarate për mediat, zëdhënësi i MEPJ-së, Alteo Hysi, bëri me dije se ministria është vënë në dijeni të rastit dhe ka nisur menjëherë komunikimet diplomatike me autoritetet kompetente izraelite për të siguruar informacion të plotë mbi situatën.
Sipas reagimit zyrtar, prioritet mbetet garantimi i të drejtave të shtetasit shqiptar, përfshirë aksesin konsullor, në përputhje me konventat dhe praktikat ndërkombëtare.
MEPJ theksoi gjithashtu se po e ndjek çështjen me prioritet të lartë dhe është në kontakt të vazhdueshëm me familjarët e Baki Goxhajt, ndërsa pritet të japë informacione të tjera lidhur me zhvillimet dhe procedurat e mëtejshme.
Në përfundim të reagimit, ministria ritheksoi angazhimin për mbrojtjen e të drejtave dhe interesave të qytetarëve shqiptarë jashtë vendit, duke vijuar koordinimin me autoritetet dhe partnerët ndërkombëtarë për ndjekjen e rastit.a.b
