Detaje të reja kanë dalë në dritë lidhur me plagosjen e një efektivi policie gjatë orëve të natës në zonën e Shkozës në Tiranë.
Burime mediatike bëjnë me dije se i plagosur ka mbetur efektivi i Policisë, Anxhelo Kumaraku, i cili shërben si agjent pranë Komisariatit nr. 4 në kryeqytet. Ngjarja ndodhi rreth orës 00:10 të datës 18 maj 2026.
Sipas informacioneve paraprake, polici është qëlluar me armë zjarri në këmbë dhe ndodhet jashtë rrezikut për jetën.
Mësohet se në momentin e atentatit, efektivi ka qenë pranë banesës së tij, i shoqëruar nga një komshi, i cili rezulton të jetë me masë sigurie “arrest shtëpie” për armëmbajtje pa leje.
Hetimet paraprake dyshojnë se objektiv i sulmit ka qenë pikërisht personi që shoqëronte efektivin, ndërsa pista kryesore lidhet me konflikte të mundshme për pazare droge.
Ndërkohë, mbetet ende e paqartë arsyeja pse polici ndodhej në shoqërinë e një personi që ishte nën masë sigurie dhe që dyshohet se kishte thyer vendimin e gjykatës duke dalë nga banesa.
Policia dhe Agjencia e Mbikëqyrjes Policore, nën drejtimin e Prokurorisë, vijojnë hetimet për zbardhjen e plotë të ngjarjes dhe identifikimin e autorëve.a.b
