Publikohen detaje të reja lidhur me takimet e posaçme të disa personazheve të njohur të rrjeteve sociale dhe showbiz-it shqiptar me të dënuar apo të paraburgosur në burgjet e vendit.
Sipas gazetarit Flamur Vezaj, bëhet fjalë për takime të zhvilluara në institucionet e vuajtjes së dënimit në Reç, Fier, Peqin, Drenovë dhe Fushë-Krujë, ku figura të njohura të botës së krimit dyshohet se kanë pritur vajza të njohura të ekranit dhe rrjeteve sociale.
Në emisionin “Ma Shqip”, Vezaj deklaroi se disponon video, fotografi dhe dokumente që sipas tij provojnë zhvillimin e këtyre takimeve, të filmuara nga protagonistët apo të siguruara nga kamerat e sigurisë së burgjeve.
Mes emrave të përmendur është edhe Safet Bajri, për të cilin thuhet se ka zhvilluar takime private me një vajzë të identifikuar me inicialet R.R. Gazetari tha se ekzistojnë edhe deklarata noteriale të depozituara në burgje për realizimin e këtyre vizitave.
Po ashtu, përmenden edhe Ramazan Rraja, Redjon Rraja, Leonard Duka, Petrit Lakatos alias Petrit Sulejmani, Artur Haxhiosmani, Leart Haxhiu dhe Gazmend Brraka alias Gaxhai, të cilët sipas raportimit dyshohet se kanë zhvilluar takime me vajza të njohura të rrjeteve sociale dhe ekranit shqiptar.
Në rastin e Leart Haxhiut, përmendet edhe emri i modeles nga Kosova, Ziza Pajaziti.
Sipas raportimit, agjentë të Shërbimit të Kontrollit të Brendshëm të Burgjeve kanë ngritur dyshime se për realizimin e këtyre takimeve mund të jenë përdorur dokumente të falsifikuara, me përfshirjen e noterëve dhe punonjësve të burgjeve.
Gazetari Vezaj tha se ka zgjedhur të mos publikojë videot që disponon, pasi në to shfaqen momente intime dhe situata sensitive për personat e përfshirë.
