Një operacion i zhvilluar në Sarandë ka çuar në arrestimin e 8 personave dhe ndalimin e 4 punonjësve të policisë, pas zbulimit të një ndërtimi pa leje në një hapësirë plazhi në qytetin bregdetar.
Sipas burimeve, prona ku po kryheshin punimet rezulton të ketë qenë në emër të Isuf Jaçaj, i cili mbeti i vrarë në tetor të vitit 2025 pas një shpërthimi me tritol në automjetin e tij.
Hetuesit dyshojnë se pas ngjarjes qëndron një grup kriminal me bazë në Kamëz, i cili mund të jetë i përfshirë jo vetëm në atentatin ndaj Jaçajt, por edhe në ngjarje të tjera kriminale në zonën e Sarandës.
Në këtë pronë, që sipas dyshimeve është marrë me forcë nga grupi kriminal, po ndërtohej një “beach bar”, i planifikuar të vihej në funksion gjatë sezonit turistik.
Për lejimin e ndërtimit pa leje dyshohet se janë përfshirë drejtues dhe efektivë të policisë lokale. Gëzim Bashllari, së bashku me vartësit e tij Andi Duro, Ajdin Ismailaj dhe Robert Çullaj, janë ndaluar nga Agjencia e Mbikëqyrjes Policore, pasi dyshohet se kanë marrë ryshfet për të lejuar ndërtimin.
Operacioni u ndërmor pas denoncimeve të mbërritura në Policia e Shtetit lidhur me ndërhyrje dhe punime të paligjshme në lagjen nr. 1 të Sarandës. Objekti i konstatuar përbëhej nga disa struktura, një pjesë e të cilave ishin ngritur edhe mbi vijën bregdetare.
Ndërkohë, policia ka shpallur në kërkim edhe një grua, e dyshuar si poseduesja e hapësirës së plazhit, për llogari të së cilës po kryheshin ndërtimet e paligjshme.
