Agjencia e Mbikëqyrjes Policore ka nisur hetime për fenomenin e ndërtimeve pa leje në zonën e Sarandë dhe Ksamil, me fokus rolin dhe përgjegjësinë e efektivëve të policisë në lejimin apo mosparandalimin e këtyre ndërtimeve të paligjshme.
Burime bëjnë me dije se deri më tani janë arrestuar shefi i Komisariatit të Policisë Sarandë, Gëzim Bashllari, shefi i Krimeve Andi Duro, si edhe dy efektivë policie.
Hetimet e AMP-së vijnë pas dy rasteve të evidentuara ditët e fundit në jug të vendit. Në njërin rast, Prokuroria vendosi sekuestrimin e katit të një hoteli të ndërtuar pa leje, ndërsa në rastin tjetër, në një plazh në Ksamil, policia arrestoi 8 punëtorë që po kryenin punime të paligjshme.
Mësohet se hetimi ka nisur pas dyshimeve për përfshirje apo neglizhencë të punonjësve të policisë në raport me ndërtimet pa leje në zonë.
Sipas burimeve konfidenciale, AMP ka vënë në pranga dy inspektorë dhe priten zhvillime të tjera në vijim të operacionit. a.b
