Ilir Meta ka reaguar me një postim në rrjetet sociale lidhur me çështjen e lobimit në SHBA dhe akuzat e ngritura ndaj tij, duke publikuar një denoncim që sipas tij i ishte drejtuar Departamentit Amerikan të Drejtësisë që në janar të vitit 2017.
Meta shprehet se dokumenti është hartuar më 30 janar 2017 në praninë e tij nga presidenti i “McKeon Group”, pasi ishte njohur me atë që ai e cilëson si një kontratë të paligjshme dhe të paautorizuar nga ai dhe LSI, e regjistruar sipas tij nga avokati greko-amerikan Fidetzis në kuadër të ligjit FARA.
“Ky denoncim drejtuar Departamentit të Drejtësisë në SHBA nga Presidenti i ‘McKeon Group’, është shkruajtur në prezencën time më 30 janar 2017, pasi u njoha me kontratën e paligjshme dhe të paautorizuar nga unë dhe LSI që ishte regjistruar nga avokati greko-amerikan Fidetzis për FARA”, shkruan Meta.
Ish-presidenti shton se ky veprim sipas tij dëshmon “integritetin” dhe respektimin e ligjit nga ana e tij.
“Sepse ky është integriteti im dhe sjellja ime me ligjin dhe me të vërtetën. Sepse nuk mund të bëhem ‘Gruaja e Bilalit’ dhe as shoku i McGonigalit, siç e provoi sot me fakte Z. Tedi Blushi”, deklaron Meta.
Në reagimin e tij, Meta akuzon gjithashtu kryeministrin Edi Rama dhe financierin George Soros për atë që e quan “operacion kriminal mediatiko-ligjor”.
“I gjithë operacioni kriminal mediatiko – ligjor, brenda dhe jashtë vendit që nga ‘Mother Jones’ e George Sorosit në 2018 e deri tek ‘Kronen Zeitung’ në Austri, e qindra artikuj të tjerë edhe me letërporositë e manipuluara të miqve të McGonigalit, janë vetëm financim kriminal i dyshes Soros-Rama”, shkruan ai.
Meta u bën thirrje ndjekësve të lexojnë dokumentin që ka publikuar, duke theksuar se sipas tij, ai kishte denoncuar “mashtruesin greko-amerikan” që në vitin 2017.
“Kjo është vetëm maja e majës së ajsbergut që kanë ndodhur gjatë këtij procesi kriminal, që nuk ka kursyer as transparencën dhe as bashkëpunimin e fortë në drejtim të zbatimit të ligjit që duhet të ketë Shqipëria me SHBA”, përfundon reagimi i Metës. a.b
