Autoriteti Kombëtar i Ushqimit ka njoftuar se një mostër ushqimore e marrë në kuadër të hetimeve për helmimin e dyshuar të disa kursantëve në Akademinë e Sigurisë në Sauk ka rezultuar jokonforme nga analizat laboratorike.
Sipas AKU-së, janë kampionuar nëntë mostra, përfshirë lëndë të para dhe produkte të gatshme. Laboratori i Referencës ISUV ka konfirmuar se tetë prej tyre kanë rezultuar brenda normave, ndërsa një kampion makarona, produkt i gatshëm i marrë në kuzhinën e Akademisë së Sigurisë, ka dalë me ngarkesë mbi normë të bakterit Escherichia Coli dhe B. staphylococcus koagulaze pozitive.
Pas këtyre rezultateve, AKU ka vendosur ndërprerjen e aktivitetit në ambientet e kuzhinës së Akademisë së Sigurisë deri në plotësimin e kërkesave ligjore për pastrimin dhe dezinfektimin e ambienteve dhe pajisjeve të punës.
Në vijim të hetimeve dhe ndjekjes së gjurmueshmërisë së produkteve, kontrollet janë shtrirë edhe në Garnizonin “Skënderbej” pranë Forcave të Armatosura, ku prodhoheshin ushqimet e shpërndara. Referuar konstatimeve të institucioneve shëndetësore dhe raportit përfundimtar të hetimit epidemiologjik, janë evidentuar rezultate jokonforme për tregues të higjienës, si në kampionët në ruajtje ashtu edhe në disa pajisje pune.
Për këtë arsye, AKU ka urdhëruar ndërprerjen e aktivitetit edhe për subjektin “SORI-AL” në ambientet e Garnizonit “Skënderbej”.
Gjithashtu, ndaj subjektit është vendosur masë administrative me gjobë në vlerën 1.5 milionë lekë për tregtim ushqimi të pasigurt dhe shkelje të kushteve higjieno-sanitare.
AKU bëri të ditur se subjektit i është lënë detyrë edhe kryerja e procedurës së asgjësimit për produktin e bllokuar që rezultoi jokonform.
