Ish-drejtoresha e Agjencia Kombëtare e Shoqërisë së Informacionit, Mirlinda Karçanaj, ishte e ftuar mbrëmjen e kësaj të enjteje në emisionin Top Story me moderatoren Grida Duma, ku foli edhe për ish-zëvendësin e saj, Daniel Shima.
Gjatë intervistës, Karçanaj komentoi rolin e Shimës në procedurat e prokurimeve në AKSHI, si edhe ngjarjen e fundit kur ai u denoncua i zhdukur për disa orë nga familjarët, për t’u rikthyer më pas në banesë dhe për të deklaruar në polici se ishte larguar me dëshirën e tij.
“Daniel Shima ka qenë përgjegjës për të gjithë procesin administrativ të procesit të prokurimit. Unë kam qenë e përqendruar të plotësohet procedura teknologjike për tu bërë AKSHI, ky që është sot.
Unë personalisht nuk jam marrë me këtë proces, por jam përkushtuar për të ndjekur me kujdes këtë proces që të bëhet brenda rregullave.
Në një periudhë unë e kam deleguar autoritetin kontraktor te Daniel Shima dhe gjatë kësaj periudhe nuk kam pasur komunikim në lidhje me këtë procedurë.
Unë nuk dua të paragjykoj Daniel Shimën në lidhje me atë çka po thuhet në media, por duhet të them se institucionet duhet të hetojnë me seriozitet.
Për të mirën flet vetë historia e AKSHI-t, ndërsa për të keqen do të duhet të presim fundin e hetimeve dhe vendimet e gjykatës”, u shpreh Mirlinda Karçanaj.
Pak ditë më parë, Gjykata e Lartë vendosi ndryshimin e masës së sigurisë për Karçanajn nga “arrest shtëpie” në “detyrim paraqitjeje”. Ajo po hetohet nga Struktura e Posaçme kundër Korrupsionit dhe Krimit të Organizuar për akuza që lidhen me abuzime në tenderat e zhvilluar nga AKSHI gjatë kohës që drejtonte institucionin.
