Policia e Shtetit ka finalizuar operacionin e koduar “Banka e Rreme 2”, në kuadër të goditjes së krimit kibernetik dhe mbrojtjes së qytetarëve nga mashtrimet online.
Sipas njoftimit zyrtar, hetimet zbuluan një skemë mashtruese të tipit “smishing”, përmes së cilës qytetarëve u dërgoheshin mesazhe SMS në emër të një banke të nivelit të dytë. Në këto mesazhe, qytetarëve u kërkohej të përditësonin të dhënat e tyre bankare duke klikuar në një link mashtrues, i cili imitonte faqen zyrtare të institucionit financiar.
Si pasojë e kësaj skeme, disa persona kanë dhënë të dhënat bankare dhe u janë komprometuar llogaritë.
Pas hetimeve të kryera nga Drejtoria për Hetimin e Krimeve Kibernetike, në bashkëpunim me Drejtorinë Vendore të Policisë Tiranë dhe Prokurorinë, u bë i mundur identifikimi dhe arrestimi i shtetasit I.K., 25 vjeç, me shtetësi holandeze, i dyshuar si autor i skemës mashtruese.
Ndërkohë, policia ka shpallur në kërkim edhe shtetasin A.R., i dyshuar si bashkëpunëtor në këtë aktivitet kriminal.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Mashtrimi kompjuterik” dhe “Falsifikimi kompjuterik”.
Policia e Shtetit u bëri apel qytetarëve të tregojnë kujdes maksimal ndaj mesazheve apo linkeve të dyshimta që kërkojnë të dhëna personale ose bankare, duke theksuar se asnjë institucion bankar nuk kërkon përditësim të të dhënave sensitive përmes SMS-ve apo linkeve të dërguara në telefon.
Autoritetet ftojnë qytetarët që çdo rast të dyshimtë ta raportojnë menjëherë pranë Policisë së Shtetit ose pranë bankës së tyre. a.b
