Detaje të reja kanë dalë nga vrasja e 66-vjeçarit Rexhep Ismaili në fshatin Gjashtë në Sarandë. Sipas hetimeve paraprake, Ismaili dyshohet se është vrarë pa qenë pjesë direkte e konfliktit që çoi në ekzekutimin e tij.
Burime nga hetimi bëjnë me dije se ngjarja nisi kur në lokalin në pronësi të viktimës kanë mbërritur të paktën 10 persona të armatosur, të cilët dyshohet se kishin një konflikt pronësie me një person që ndodhej aty dhe synonin ta rrëmbenin.
Sipas të dhënave paraprake, mes personave të përfshirë në ngjarje ka qenë edhe Lulzim Tabaku, i cili dyshohet si autor i krimit dhe aktualisht është shpallur në kërkim.
Mësohet se Rexhep Ismaili ka ndërhyrë për të mbrojtur personin që ndodhej në lokalin e tij, duke u thënë autorëve: “Djali është në shtëpinë tonë dhe nuk e prekni dot këtu”, çka dyshohet se ka sjellë agravimin e situatës dhe më pas shkëmbimin e zjarrit.
Sipas Policisë së Sarandës, viktima nuk ka pasur konflikt të drejtpërdrejtë me autorët, ndërsa hetimet po përqendrohen tek dinamika e përplasjes dhe motivet që çuan në krim.
Në vendngjarje ka mbetur edhe një automjet që dyshohet se u përket autorëve, i cili është sekuestruar nga policia si provë materiale. Gjithashtu, gjatë shkëmbimit të zjarrit dyshohet se ka mbetur i plagosur edhe një person tjetër, i cili nuk është paraqitur në spital, por është larguar bashkë me Lulzim Tabakun. a.b
