Amendamente e propozuara nga disa deputetë në ligjin “Kodi Rrugor i Republikës së Shqipërisë”, të ndryshuar” parashikojnë masa më të ashpra për drejtuesit e automjeteve, veçanërisht për shoferët e rinj, personat që qarkullojnë pa patentë dhe shkelësit e përsëritur të rregullave të qarkullimit.
Sipas ndryshimeve të propozuara, çdo person që kapet duke drejtuar mjet pa leje drejtimi nuk do të mund të pajiset me patentë për një periudhë 1-vjeçare, përveç përgjegjësive që parashikon legjislacioni penal në fuqi.
Masa më të forta janë parashikuar edhe për të miturit. Nëse një i mitur kapet duke drejtuar mjet pa patentë, ai nuk do të mund ta marrë lejen e drejtimit menjëherë pas mbushjes së moshës 18-vjeçare, por vetëm pas moshës 20-vjeçare.
Projektligji vendos gjithashtu tolerancë zero ndaj alkoolit për shoferët gjatë vitit të parë pas marrjes së patentës, duke ndaluar çdo nivel alkooli në gjak gjatë drejtimit të automjetit.
Për shoferët e rinj janë propozuar edhe kufizime të reja të shpejtësisë:
- 90 km/h në autostradë;
- 80 km/h në rrugë të tjera jashtë zonave të banuara.
Shkelja e këtyre kufijve do të dënohet me gjobë nga 5 mijë deri në 15 mijë lekë, pezullim të patentës për një muaj dhe heqje pikësh sipas akteve nënligjore në fuqi.
Një tjetër ndryshim parashikon që drejtuesit me deri në 2 vite eksperiencë nuk do të lejohen të qarkullojnë nga ora 24:00 deri në 06:00, përveç rasteve kur shoqërohen nga një person madhor që ka patentë prej të paktën 3 vitesh.
Nëse gjatë vitit të parë pas marrjes së patentës shoferi nuk kryen asnjë shkelje, kufizimet hiqen automatikisht. Por në rast se evidentohen dy shkelje gjatë kësaj periudhe, afati i provës zgjatet edhe me një vit tjetër.
Amendamentet parashikojnë gjithashtu ndalimin e përdorimit të celularit gjatë drejtimit të biçikletave dhe motorëve elektrikë.
Një nga masat më të ashpra lidhet me drejtimin e automjetit në gjendje të dehur. Sipas draftit, nëse një drejtues kapet me nivel alkooli mbi 0.5 g/l në gjak dhe është ndëshkuar më parë për të njëjtën shkelje, në rast përsëritjeje do t’i hiqet përgjithmonë patenta. a.b
