Është zbardhur menyja e ushqimit që dyshohet se shkaktoi helmimin e dhjetëra studentëve të Akademia e Sigurisë, të cilët përfunduan në spital pas konsumimit të drekës në ambientet e institucionit.
Sipas të dhënave paraprake, studentëve u është servirur për drekë sallatë me perime të ziera, gjellë me patate dhe tavë me presh, makarona ose pilaf, mish, biskota, banane dhe bukë. Pikërisht kjo menu dyshohet se ka shkaktuar problemet shëndetësore tek studentët, ndërsa autoritetet po hetojnë për të përcaktuar produktin konkret që mund të ketë sjellë helmimin. Deri tani dyshohet për brokolin dhe uthullën.
Një ditë më parë, rreth 50 studentë të Akademisë së Policisë u paraqitën në urgjencën e QSUT me simptoma të dyshuara helmimi ushqimor. Menjëherë pas mbërritjes së tyre, ekipet mjekësore kryen ekzaminimet dhe trajtimin e nevojshëm për secilin rast.
Sipas autoriteteve shëndetësore, Shërbimi Infektiv, Urgjenca Polivalente dhe Qendra Kombëtare e Urgjencës Mjekësore kaluan në gjendje gatishmërie për të përballuar situatën, ndërsa studentët iu nënshtruan analizave laboratorike për identifikimin e shkakut të helmimit.
Pas marrjes së ndihmës mjekësore, të gjithë studentët janë larguar nga spitali në gjendje të mirë shëndetësore.
Ndërkohë, hetimet e nisura nga Prokuroria e Tiranës kanë çuar në arrestimin e dy punonjësve të kompanisë së kateringut “Sori AL”, ndërsa administratorja e kompanisë, Alma Tafani, është shpallur në kërkim. a.b
