Gjykata e Lartë ka ndryshuar masën e sigurisë për Mirlinda Karçanaj, duke i hequr “arrestin në shtëpi” dhe duke e zëvendësuar atë me masat “ndalim i daljes jashtë shtetit” dhe “detyrim për paraqitje”. Kjo është masa e parë e lehtësimit për zyrtarët e lartë të akuzuar për korrupsion pas vendimit që vetë gjykata mori për të vështirësuar masën e sigurisë arrest. Duket se ky vendim i marrë sot do të shërbejë si test për të vijuar me heqjen e masave të tjera të arrestit për zyrtarë të lartë.
Në vendimin e saj, marrë sot Gjykata e Lartë ka lënë në fuqi vendimin nr. 4, të Gjykata e Posaçme e Apelit për Korrupsionin dhe Krimin e Organizuar për sa i përket rekursuesve Erjon Ismaili dhe Gëzim Hoxha, ndërsa ka ndryshuar të njëjtin vendim për ish drejtoren e AKSHI, Mirlinda Karçanaj.
Sipas vendimit, ndaj Karçanajt është caktuar masa e sigurisë “Ndalimi i daljes jashtë shtetit”, e parashikuar nga neni 233 i Kodit të Procedurës Penale, duke iu ndaluar largimi nga territori i Republikës së Shqipërisë pa autorizimin e gjykatës.
Po ashtu, gjykata ka vendosur edhe masën “Detyrimi për t’u paraqitur në policinë gjyqësore”, sipas nenit 234 të Kodit të Procedurës Penale. Karçanaj do të duhet të paraqitet pranë policisë gjyqësore të martën e parë dhe të tretë të çdo muaji, në orën 10:00.
Ekzekutimi i këtij vendimi i është ngarkuar SPAK. a.b
