Deputeti i PD, Besart Xhaferri, ka reaguar ashpër ndaj kreut të grupit parlamentar socialist, Taulant Balla, pas debatit në Kuvend për rezolutën mbi njohjen e gjenocidit serb në Kosovë dhe protoganizmit të tij në protestën në mbështetje të ish komandantëve të UÇK-së zhvilluar dje pasdite në Tiranë.
Në një deklaratë publike, Xhaferri e ka ironizuar Ballën duke e quajtur “komandant i Diasporës”, që “kujton se ka luftuar serbët në vitin 1998, ashtu siç masakroi votat e emigrantëve në vitin 2025”.
Sipas tij, hipokrizia e Parlamentit Shqiptar në raport me Kosovën shihet qartë vetëm nga emri i Taulant Ballës, i cili urdhëroi deputetët socialistë të votojnë kundër rezolutës për njohjen e gjenocidit serb në Kosovë, ndërsa më pas doli në foltore e foli sikur ai dhe Edi Rama kishin shembur kufirin shqiptaro-shqiptar, e jo Agim Ramadani me shokët e tij.
“Kosova nuk është retorikë, por është vokacion. Nëse ke lindur e je rritur me shall të kuq dhe ke adhuruar familjarisht Enver Hoxhën, nuk ke si ta dish kush janë Shaban Polluzha, Tahir Meha, Rexhep Mala e Bahri Fazliu,” shkruan më tej Xhaferri.
Ai e mbyll reagimin me ironi ndaj Ballës.
“Nuk mund të flasësh ditën për UÇK-në, e natën të ëndërrosh pjesëmarrjen në koncertet e Goran Bregoviçit e të lexosh kujtimet e Sinisha Mihajloviçit.” m.k
