Redi Molla
Gjykata e Posaçme e Apelit për Korrupsionin dhe Krimin e Organizuar ka vendosur të ndryshojë masën e sigurisë për të pandehurin Redi Molla, një nga emrat e përfshirë në dosjen e njohur “5D”.
Vendimi u shpall sot nga gjyqtarja Iliriana Olldashi, e cila drejtoi seancën me trup gjykues monokratik. Bëhet fjalë për çështjen penale nr. 188, akti datë 01.09.2025, që kishte si objekt ankimin e paraqitur nga i pandehuri kundër vendimit nr. 531, datë 31.07.2025 të Gjykatës së Posaçme të Shkallës së Parë.
Në përfundim të shqyrtimit, Gjykata e Apelit vendosi zëvendësimin e masës së sigurisë “arrest në burg” me “arrest në shtëpi”, në bazë të nenit 237 të Kodit të Procedurës Penale, duke urdhëruar që Molla të mos largohet nga banesa e tij. Po ashtu, gjykata ka urdhëruar lirimin e tij të menjëhershëm nga paraburgimi, nëse nuk mbahet për ndonjë shkak tjetër ligjor.
Ekzekutimi dhe kontrolli i zbatimit të këtij vendimi i është ngarkuar Prokurorisë së Posaçme (SPAK) dhe policisë gjyqësore.
Kush është Redi Molla
Redi Molla është një nga personat e hetuar në kuadër të dosjes “5D”, që lidhet me kontrata publike dhe dyshime për korrupsion, pastrim parash dhe fshehje të të ardhurave. Ai është identifikuar nga hetimet si një ndër pronarët “de facto” të kompanisë 5D Konstruksion sh.p.k, përfituese e disa projekteve publike në fusha të ndryshme.
SPAK ka sekuestruar më herët një sërë pasurish të lidhura me Mollën, përfshirë prona, automjete dhe llogari bankare, si pjesë e hetimeve për origjinën e fondeve të kompanisë. Mediat kanë raportuar se një nga arsyet që ndikoi në ndryshimin e masës së sigurisë është edhe gjendja shëndetësore e përkeqësuar e tij. m.k
