Kombëtarja shqiptare ka shënuar golin e parë në ndeshjen ndaj Letonisë që po zhvillohet në stadiumin “Air Albania” në Tiranë. Kuqezinjtë realizuan nga pika e bardhë në minutën e 24-të, duke kaluar në avantazh dhe duke ndezur entuziazmin e tifozëve.
Ky takim ka një rëndësi jetike për djemtë e Silvinjos, pasi çdo rezultat përveç fitores do ta komplikonte ndjeshëm rrugën drejt një prej dy vendeve të para në grup. Në rast tjetër, Shqipërisë do t’i duheshin mrekulli në sfidat e mbetura. Për këtë arsye, trajneri brazilian ka hedhur në fushë një formacion me theks të madh ofensiv.
Në krahasim me sfidën ndaj Gjibraltarit, Silvinjo ka bërë ndryshime të shumta, duke filluar nga porta me Strakoshën, ndërsa prapavija është rreshtuar me dyshen Gjimshiti–Ajeti në qendër, Mitajn në të majtë dhe Hysajn që ka ruajtur vendin në të djathtë. Në mesfushë është rikthyer treshja titullare Shehu–Asllani–Laçi. Në sulm, Bajrami është pozicionuar në të majtë, Broja në të djathtë, ndërsa Manaj titullar në qendër.
Takimi nisi me ritëm, ku Shqipëria kërkoi herët epërsinë. Në minutat e para u evidentuan disa tentativa, si harkimi i Hysajt për Laçin që gjuajti me kokë, apo aksionet individuale të Brojës dhe Bajramit. Dominimi i kuqezinjve u shpërblye në minutën e 24-të, kur pas një faulli në zonë, arbitri akordoi penallti që u kthye në gol.
Formacionet zyrtare:
- Shqipëria: Strakosha, Gjimshiti, Ajeti, Hysaj, Mitaj, Shehu, Laçi, Asllani, Bajrami, Broja, Manaj. Trajner: Silvinjo
- Letonia: Zviedris, Jurkovskis, Melniks, Çernomordijs, Balodis, Ciganiks, Varslavans, Vapne, Zelenkovs, Daskevics, Sits. Trajner: Paolo Nikolato. r.s
