Kryeministri Edi Rama e nisi javën me një takim me kandidatët për deputetë të Partisë Socialiste në Tiranë, duke shprehur besimin se kjo forcë politike mund të arrijë gati 1 milion vota në zgjedhjet e 11 majit.
Gjatë fjalës së tij, kreu i PS foli edhe për afrimet e reja në parti nga radhët e opozitës, duke argumentuar se kjo është rezultat i zhgënjimit të tyre me forcat kundërshtare.
“Në skuadrën tonë për 11 majin kemi edhe individë që kanë kaluar në anën tonë pas një reflektimi të gjatë, duke kuptuar se nuk ka asnjë perspektivë nga ata që sot janë përballë nesh,” tha Rama.
Ai theksoi se Partia Socialiste është një forcë politike gjithëpërfshirëse dhe e hapur për ata që ndajnë të njëjtat objektiva. “PS nuk është e kufizuar vetëm brenda anëtarësisë së saj, por mishëron vullnetin e qindra mijëra shqiptarëve. Me votën e diasporës, mund t’i afrohemi 1 milion votave,” shtoi ai.
Kryeministri e cilësoi këto zgjedhje si një moment me rëndësi të veçantë, duke nënvizuar peshën e tyre specifike gjeopolitike. “Kurrë më parë nuk ka pasur një moment zgjedhor me këtë rëndësi strategjike,” përfundoi ai.
