Kuvendi i Shqipërisë ka reaguar këtë të enjte pas aktgjykimit të Dhomave të Specializuara në Hagë ndaj katër ish-drejtuesve të Ushtrisë Çlirimtare të Kosovës, të cilët u dënuan me një total prej 81 vitesh burgim.
Në një deklaratë zyrtare të lexuar nga kryetari i Kuvendit, Niko Peleshi, Kuvendi thekson se lufta e UÇK-së ishte luftë për çlirimin e Kosovës dhe kundër represionit të regjimit të Slobodan Millosheviçit.
“Kuvendi i Shqipërisë rithekson një të vërtetë historike, që nuk mund të relativizohet. Lufta e UÇK ishte luftë për çlirimin e Kosovës, për t’i dhënë fund represionit, dhunës dhe përndjekjes. Ajo lindi si përgjigje ndaj dhunës, represionit, spastrimit etnik dhe gjenocidit të regjimit gjakatar të Millosheviçit”, thuhet në deklaratë.
Kuvendi shprehet se aktgjykimi nuk mund të rishkruajë historinë e Kosovës dhe nuk duhet të barazojë agresorin me viktimën.
“Vendimi nuk mund të rishkruajë historinë e një populli apo të barazojë agresorin me viktimën. Kuvendi shpreh shqetësimin e thellë për standardet e dyfishta në trajtimin e të kaluarës së vendit tonë”, thuhet më tej në deklaratë.
Në deklaratë kritikohet gjithashtu glorifikimi publik i personave të dënuar për krime lufte, ndërsa Kuvendi thotë se nderimet shtetërore për persona të tillë cenojnë kujtesën e viktimave dhe pengojnë pajtimin.
“Kuvendi qëndron kundër çdo përpjekjeje të Serbisë dhe Rusisë për ta instrumentalizuar këtë vendim dhe delegjitimuar luftën e UÇK-së”, thuhet në deklaratën e Kuvendit.
Dhomat e Specializuara të Kosovës në Hagë shpallën më 16 shtator fajtorë Hashim Thaçin, Kadri Veselin, Rexhep Selimin dhe Jakup Krasniqin për krime lufte. Sipas gjykatës, katër të akuzuarit u gjetën individualisht përgjegjës për arrestim dhe ndalim të paligjshëm ose arbitrar, trajtim mizor, torturë dhe vrasje.
Thaçi dhe Krasniqi u dënuan me nga 25 vjet burgim, Veseli me 18 vjet, ndërsa Selimi me 13 vjet. Gjykata i shpalli të katër të pafajshëm për akuzat për krime kundër njerëzimit.
Aktgjykimi i shkallës së parë parashikon kreditimin e kohës së kaluar në paraburgim. m.k
