Gazment Bardhi ka denoncuar në Kuvend rastin e kompanisë “AMG Food”, e cila kishte përfituar nga fondet e IPARD ndërsa pak ditë më parë iu sekuestruan 41 kilogramë kokainë në një kontejner me mish pule në Portin e Durrësit.
Në fjalën e tij në seancë plenare, kryetari i grupit parlamentar të PD-së tha se rasti tregon mënyrën se si fondet publike dhe europiane po përdoren dhe se si krimi i organizuar është futur në sektorë të ndryshëm të ekonomisë.
“Qeveria ka para, por ka zgjedhur të financojë me to Roni Jefetët e vet, Ergys Agasët e vet dhe trafikantët e kokainës. Madje këta i financon edhe me fondet e Bashkimit Europian”, deklaroi Bardhi.
Sipas tij, kompania “AMG Food” është krijuar në vitin 2019 dhe ka përfituar mbështetje nga programi IPARD. Dokumentet zyrtare të qeverisë konfirmojnë se “AMG Food” ishte një prej përfituesve të mbështetjes së IPARD dhe se Kryeministri Edi Rama e vizitoi kompaninë në vitin 2021, gjatë një aktiviteti për promovimin e investimeve të mbështetura nga programi.
Në materialet zyrtare të publikuara nga Kryeministria në korrik 2021 thuhet se investimi i “AMG Food” në përpunimin e mishit mbështetej nga IPARD, ndërsa në sektorin e përpunimit të mishit ishte parashikuar një grant prej rreth 4 milionë eurosh.
Bardhi e lidhi këtë rast edhe me sekuestrimin e 41 kilogramëve kokainë në Portin e Durrësit. Sipas raportimeve të publikuara pas operacionit, droga u gjet në një kontejner me mish pule nga Brazili, ngarkesë e porositur nga “AMG Food”. Deri në këtë fazë, nuk ka të dhëna se kompania apo përfaqësuesit e saj janë akuzuar zyrtarisht se kishin dijeni për kokainën; hetimi synon të përcaktojë se si droga është futur në kontejner dhe kush qëndron pas trafikut.
Kompania ishte përmendur edhe në vitin 2025 në lidhje me një ngarkesë mishi pule nga Brazili, për të cilën u konstatua prania e salmonelës, sipas raportimeve të publikuara për rastin.
Sipas dokumenteve të Komisionit Europian, programi IPARD III për zhvillimin rural, me një kontribut të BE-së prej 112 milionë eurosh, nuk kishte nisur për shkak të vonesave në procesin e delegimit të menaxhimit të fondeve. m.k
