Kryeministri Edi Rama, gjatë pjesëmarrjes në Panairin e Turizmit në Berlin, theksoi transformimin e Shqipërisë nga një vend i izoluar në një destinacion turistik me rritjen më të shpejtë në botë. Ai ftoi turistët gjermanë dhe ndërkombëtarë të zbulojnë bukuritë e Shqipërisë, duke nënvizuar se vendi ofron një kombinim unik të natyrës, historisë dhe mikpritjes.
“Turistët janë rritur 10 herë në 10 vitet e fundit. Shqipëria ofron ujëra të kristaltë, plazhe të virgjëra, male dhe peizazhe të egra për adhuruesit e natyrës, si dhe kështjella të mbrojtura nga UNESCO,” deklaroi Rama.
Ai vuri në dukje se aeroporti “Nënë Tereza” ka regjistruar një numër rekord prej 11 milionë pasagjerësh gjatë vitit të fundit, një tregues i qartë i zhvillimit të turizmit në vend.
Rama kujtoi të kaluarën e izoluar të Shqipërisë, duke e krahasuar me Korenë e Veriut të Europës. “Deri në vitin 1990, Shqipëria ishte e shkëputur nga bota. Kishim kufizime ekstreme, madje as turistët nuk mund të hynin pa kaluar te berberi i aeroportit,” tha ai.
Duke cituar gazetën gjermane Bild, Rama theksoi se Shqipëria nuk është më një destinacion i panjohur, por po kthehet në një nga pikat më të nxehta të turizmit europian. “Rritja është kaq e madhe dhe nuk po ndalet. Shqipëria nuk është ajo që keni menduar, është shumë më tepër – është një përvojë për të gjitha shqisat,” përfundoi ai. a.b
