Beteja e Ramës me katet është licencë për trafikantët e drogës, deklaroi sot nga Shkodra kreu i PD, Sali Berisha.
Kryetari demokrat, Sali Berisha, tha në Shkodër se Edi Rama po jep me koncesion edhe policinë.
“Tani policinë e dhanë me koncesion te baronët e drogës. Kushdo prej tyre merr repart police”.
Ai u ndal edhe te çështje e ndërtimeve pa leje.
“Ka filluar tani betejën me katet. Njeriu që kontrollon7 gjithçka, në një pikë të vendimit thotë, ai që do të blejë katet shtesë, le t’i blejë. Kjo është licencë për trafikantët e drogës që të blejnë katet shtesë, pasi të ndërtohen.
Trafikantët kanë katet e pallateve si shoping kryesor. Nuk blejnë apartamente ata, blejnë kate.
Shqipëria ka ndërtuesin më të lartë të ndërtimit dhe ka çmimet e treta më të larta në Europë. Lumenjtë e drogës blejnë katet. Ky u hap rrugën këtyre për të blerë katet, se nuk lahen ndryshe paratë. Ky nxjerr Pasaportën e Artë dhe bën amnistinë fiskale për të pastruar paratë dhe falimentuar bizneset e ndershme në Shkodër dhe mbarë Shqipërinë,” tha Berisha.
Duke folur për protestat e pritshme, kreu i PD, Sali Berisha tha sa ka kordinim me Shtëpinë e Lirisë dhe Frontin për Shpëtimin e Shqipërisë. U bëjmë thirrje qytetarëve të marrin pjesë.
“Lëvizjet e mëdha do koordinohen padiskutim me Partinë e Lirisë dhe me të gjithë frontin. Ekziston një front, Fronti për Shpëtimin e Shqipërisë, ky front ishte ai që organizoi 7 Korrikun, ky front do të organizojë tani lëvizjen e madhe apo kryengritjen paqësore të shqiptarëve për shpëtimin e Shqipërisë nga rreziku.
Ndaj dhe Partia e Lirisë shumë normale vendos për protesta dhe kudo që bëhen protesta, ne u bëjmë thirrje qytetarëve të marrin pjesë.
Protestë për shembull kanë lajmëruar qytetarët e Vlorës, nuk ka protestë më të ligjshme se ajo, se të sjellësh përbindësha që emëtojnë squfur në ditë sa 1 mijë makina në një qytet me përmasa të kufizuara siç është Vlora.
Nuk është një qytet i hapur, do të thotë t’i helmosh, do të thotë t’ju mbushësh ajrin me grimca kancerogjene, është një krim i rëndë i shëndetit dhe mjedisit të Vlorës.
Do të dalin ata, qytetarët do të kenë mbështetje të plotë të Partisë Demokratike për të dalë derisa t’i përzenë nga ujërat e Vlorës”, tha Berisha. a.b
