Detaje të reja janë zbardhur paraditen e sotme për drogën e kapur mbrëmë në një kamion në portin e Durrësit. Policia ka identifikuar një nga bashkëpunëtorët e përfshirë në skemën e gjetjes dhe tregtimit të lëndës narkotike.
Pas identifikimit të drejtuesit të kamionit, shtetasit Drilon Istrefi, policia ka shpallur në kërkim shtetasin me iniciale D.N banues në lagjen 6 të Durrësit, i cili dyshohet të ketë bërë të mundur gjetjen e heroinës.
Së bashku me njëri-tjetrin të dy shtetasit dyshohet të kenë kaluar dhe herë të tjera drogë nëpërmjet Pikës së Kalimit Kufitar në Durrës duke shfrytëzuar mundësinë e transportit të mallrave nëpërmjet kompanisë së transportit.
Droga ka patur si destinacion Italinë, ndërsa mësohet se hetimet janë shtrirë dhe për zbulimin e palës pritësëe. Dyshohet që 4 pakot me heroinë të kenë kaluar nga Muriqani, ndërsa u gjet tek koka e kamionit poshtë dyshekut të shoferit.
