Avokati Maks Haxhia, mbrojtës i Ergys Agasit, të arrestuar mbrëmjen e së mërkurës në Durrës, ka dhënë një deklaratë për mediat pas takimit me klientin e tij në Bllokun e Sigurisë në Tiranë.
Haxhia tha se takimi ishte i pari dhe se mbrojtja po përgatitet për procesin gjyqësor që pritet të zhvillohet në ditët në vijim, lidhur me masën dhe kushtet e arrestimit të Agasit.
Avokati u shpreh se mbrojtja kërkon të ketë në dispozicion dosjen hetimore, duke pretenduar se ajo nuk u është vënë ende në dispozicion, pavarësisht kërkesave të përsëritura.
“Ky është një takim i parë dhe përgatitemi për procesin që është në ditët e afërta lidhur me arrestin dhe kushtet e arrestimit. Kuptohet që ne duam dosjen, sepse është e turpshme që edhe pas kaq kohësh që e kemi kërkuar, kjo nuk ka ndodhur. Pa dosjen nuk ngremë dot pretendimet”, deklaroi Haxhia.
Sipas avokatit, Agasi pretendon se nuk ka përgjegjësi juridike për çështjen që po hetohet, pasi, sipas tij, nuk ka pasur funksione në autoritete që menaxhojnë financat publike dhe nuk ka pasur rol në tendera.
“Agasi pretendon se është jashtë çdo ngarkese juridike, pasi nuk ka prekur financat publike, nuk ka mbajtur funksione të autoriteteve që menaxhojnë financat publike, as lidhur me tenderat. Media e ka fryrë dhe zbardhur çështjen”, tha ai.
Haxhia kritikoi gjithashtu mënyrën se si, sipas tij, po zhvillohen hetimet, duke argumentuar se fillimisht vendoset arresti dhe më pas kryhen hetimet.
“Këta të fusin në burg, pastaj të bëjnë hetimet. Si ajo historia që të marrin, të presin këmbën dhe pastaj të numërojnë nëse i ke apo jo të dyja këmbët”, u shpreh avokati.
Ergys Agasi u arrestua mbrëmjen e 26 gushtit në zonën e Plepave në Durrës, në kuadër të operacionit “The Wanted”. SPAK e akuzon atë për disa vepra penale, ndërsa ndaj tij ishte caktuar më herët masa e sigurisë “arrest në burg”.a.b
