Teksa një operacion i gjerë është duke u zhvilluar në Europë, për arrestimin e autorit të dyshuar të masakrës së Berlinit, gazetarët e BBC kanë shkuar në ndërtesën, 24 – vjeçari tunizian, Anis Amri ka jetuar.
Ai kishte një dhomë të vogël në një ndërtesë sëbashku me 16 emigrantë të tjerë të shpërndarë në dy kate. Gazetari i BBC intervistoi refugjatë nga Shqipëria dhe Iraku, të cilët u përgjigjën se dinin shumë pak për Anis Amri, i cili kishte qëndruar në këtë vend për një kohë të shkurtër.
“Nuk e njoh fytyrën e tij”, shprehet Andi, i riu nga Shqipëria, kur gazetari i tregoi një foto të autorit të dyshuar të Berlinit.
“Por kemi biseduar për sulmin me refugjatët e tjerë dhe sesi ky person kishte lidhje me xhihadistët këtej. Ndoshta ka patur vërtetë. Është e tmerrshme. Askush këtu nuk di shumë rreth tij”.
BBC shkruan se në muret e koridorit gjendet një shenjë e sëastikas, si provë e ndjenjës kundër emigrantëve. Këta të fundit shpjegojnë se ajo është vizatuar nga banorët e zonës dy muaj më parë.
Ndërkohë, të dhëna të reja kanë dalë në dritë për 24 – vjeçarin nga Tunizia, i cili të hënën në mbrëmje i mori jetën 12 personave dhe plagosi 49 të tjerë, pasi u fut me kamion në tregun e Krishtlindjes në Berlin.
Amri kishte qenë nën monitorimin e autoriteteve gjermane në fillim të këtij viti, pasi dyshohej se po planifikonte një grabitje, paratë e të cilave do t’i përdorte për të blerë armë. Por për shkak të mungesës së provave survejimi u hoq.
Përpara se të hynte në Gjermani, ai kishte qenë në burg për 4 vite në Itali, për zjarrvënie.
Aktualisht për Amrin ka një urdhër europian arresti pasi dokumentet e tij u gjetën në kamionin e përdorur në masakër, ndërsa autoritetet shprehen se ai mund të jetë i armatosur dhe i rrezikshëm.
Dyshohet se 24 – vjeçari mund të ketë mbetur i plagosur gjatë përleshjes me shoferin polak të kamionit, i cili u gjet i vdekur në të.
Mediat gjermane raportuan se Amri kishte jetuar herë pas here në Dortmund. Banorët atje e njohën nga fotot dhe treguan se ai shpenzonte kohë me një gjerman me origjinë nga Serbia, i cili u arrestua muajin e shkuar pas dyshimeve se kishte lidhje me ISIS. /tvklan.al
