Detaje të tjera zbulohen nga ngjarja e rëndë, e ndodhur në Ksamil, kur u qëllua për vdekje babai i Albi Xhezairit, person në kërkim.
“Më vrave, qen!”.
Këto ishin fjalët e fundit që ka thënë Agron Xhezairi, 53-vjeçari i qëlluar në hyrjen e shtëpisë së tij mbrëmjen e së dielës.
Babai i të shumëkërkuarit për një vrasje të ndodhur në shtator arriti t’i shpëtojë një atentati me tritol një muaj më parë, por nuk e kishte menduar se do ta ekzekutonin brenda rrethimit të shtëpisë, raporton “Panorama”.
Sipas dëshmive të marra nga Policia, ai ka qenë në prag të shtëpisë, në shkallët e hyrjes, kur u qëllua me automatik. Nga burime të Policisë mësohet se pasditen e së dielës kishte shkuar për vizitë në familjen Xhezairi kunata e viktimës. Ky ka dalë për ta përcjellë, pasi ishte bërë errësirë. Nisur dhe nga ngjarjet e kohëve të fundit, në shtëpi Xhezairi mbante një qen të lidhur te makina për ruajtje. Sa dolën jashtë e duke shkuar te makina nga kopshti i komshiut, është gjuajtur me armë mbi të.
Në atë moment mësohet të ketë thënë: “Më vrave qen!”.
Nuk është rrëzuar menjëherë, por të tjerë plumba janë hedhur mbi të dhe ai ka rënë i pajetë përballë derës së shtëpisë. Kunata e viktimës është ajo që e ka parë të gjithë skenën e krimit, por jo autorin, i cili ndodhej vetëm 5 metra larg, pas murit rrethues që e ndante shtëpinë e Xhezairit me atë të fqinjit.
DETAJE/ Vrasja në Ksamil, kush e nxori jashtë viktimën dhe fjalët e fundit që tha
