Operacioni për përballimin e situatës së zjarrit në Krujë vijon, ndërsa forcat e Policisë së Shtetit, zjarrfikësit dhe strukturat e emergjencave janë angazhuar për izolimin e vatrave dhe mbrojtjen e banorëve.
Ministri i Brendshëm, Besfort Lamallari, ka qenë në Krujë së bashku me ministrin e Mbrojtjes, Ermal Nufi, për të ndjekur nga afër situatën.
Sipas Lamallarit, zjarri është shkaktuar qëllimisht dhe Policia e Shtetit ka arrestuar autorin e dyshuar të zjarrvënies.
“Policia e Shtetit e ka arrestuar tashmë zjarrvënësin dhe ai do të përballet me pasojat e rënda ligjore për këtë vepër penale”, deklaroi ministri.
Lamallari bëri me dije gjithashtu se, pas kërkesës së pushtetit vendor, është kryer evakuimi i pjesshëm i banorëve që ndodhen pranë vatrës së zjarrit, si masë parandaluese për garantimin e sigurisë së tyre.
“Çdo forcë është në terren dhe çdo mjet është në dispozicion deri në neutralizimin e plotë të rrezikut”, u shpreh ministri i Brendshëm.
Operacioni po zhvillohet në kushte të vështira për shkak të terrenit, ndërsa në terren janë angazhuar forca tokësore dhe mjete ajrore. Strukturat zjarrfikëse dhe ekipet e emergjencave vijojnë ndërhyrjen për izolimin e vatrave dhe parandalimin e përhapjes së flakëve drejt zonave të banuara.
