Shqipëria ka bërë fare pak hapa përpara për të gjetur të zhdukurit e periudhës së komunizmit.
Ky është përfundimi i raportit të ekspertëve të OKB të cilët kanë bërë edhe propozimet për gjetjen e të zhdukurve ndërsa apelojnë që familjarët të bëjnë denoncimet përkatëse.
Ekspertët e Kombeve të Bashkuara për gjetjen e personave të zhdukur gjatë sistemit komunist kanë konstatuar se në Shqipëri janë bërë hapa të ngadaltë për kërkimin e 6000 të zhdukurve. Faktor ndikues sipas ekspertëve është edhe mosndëshkimi i autorëve dhe mungesa e vullnetit politik.
“Plagët e së shkuarës së dhimbshme janë ende të gjalla. Shqipëria duhet të merret me shkeljen e të drejtave të njeriut të kryera në periudhën nga 1944 – 1991 ku mijëra viktima u burgosën, u internuan, u ekzekutuan dhe u bënë objekt i zhdukjeve të detyruara. Shqipëria duhet të ruajë të gjitha të dhënat dhe dokumentacionin lidhur me shkeljen e të drejtave të njeriut”, shprehet Houria Es-Slami.
Përmes këtij grupi pune Shqipërisë i jepet mundësia të gjeje disa nga të zhdukurit e asaj periudhe ndërsa familjarët kanë një rol kyç në këtë proces.
“Gjëja e parë që duhet të bëjnë familjarët është të bëjnë denoncimin pranë grupit tonë ose organizatës. Po ashtu një tjetër mundësi është plotësimi on-line I formularit me të dhënat e familjarit të zhdukur. Kjo është fare e thjeshtë dhe nuk ka nevojë as për specialist e as për avokat”, shprehet Henrikas Mickevicius, anëtar.
Në përfundimet e raportit ekspertët kanë theksuar se shteti duhet të inkurajojë dhe lehtësojë një debat kombëtar publik mbi trashëgiminë e të shkuarës komuniste. Për zbatimin e kësaj iniciative OKB ka përcaktuar edhe një fond shpenzimesh.
Ekspertët e OKB: Gjatë komunizmit, 6000 të humbur
