Ekipi i Donald Trumpit e ka hedhur poshtë raportin e CIA-s, sipas të cilit Rusia është e përfshirë në vjedhjen e emaileve të demokratëve me qëllimin të shtonte mundësitë e fitores së republikanit në zgjedhjet presidenciale.
“Këta janë të njëjtët njerëz që deklaruan se Sadam Huseini kishte armë të shkatërrimit në masë”, thanë ndihmësit e Presidentit të zgjedhur. Edhe rusët vetë nga ana tjetër nuk i kanë pranuar asnjëherë akuzat e hakërimit.
Të premten, Presidenti Barack Obama urdhëroi nisjen e një hetimi mbi një seri sulmesh kibernetike gjatë fushatës zgjedhore në Shtetet e Bashkuara, përgjegjësia e të cilave i vishet Moskës. Shënjestra e këtyre sulmeve ishte Partia Demokrate dhe një drejtues i fushatës së kandidates presidenciale, Hillary Clinton, John Podesta.
Zyrtarë të lartë të administratës amerikane thanë për Neë York Times se janë të bindur që hakerat rusë kanë mundur të hyjnë edhe në sistemin kompjuterik të Komitetit Kombëtar Republikan, por informacionet e përftuara prej rrjeteve republikane ata nuk i kanë publikuar.
Agjencitë e inteligjencës shprehen se rusët pas kësaj ja kanë kaluar dokumentet e demokratëve platformës Ëikileaks, e cila u kujdes që ato sekrete t’i mësonin të gjithë.
Washington Post shkruan se inteligjenca amerikane ka identifikuar individë të lidhur me qeverinë ruse, të cilët i ofruan të dhënat Ëikileaksit, e kujton gjithashtu sesi Trump inkurajoi gjatë fushatës Moskën që të gjejë emailet e Clintonit, ndonëse më vonë u shpreh se ajo ishte thjesht sarkazëm.
“Bindja e përgjithshme agjencive amerikane të inteligjencës është se synimi rus ishte favorizimi i një kandidati përballë tjetrit”, citohet nga Ëashington Post një zyrtar i lartë i CIA-s, i cili thotë se informacioni i grumbulluar është dërguar në Senat.
Bërja publike e këtij raporti mbërrin një ditë pasi Presidenti Barack Obama urdhëroi një hetim të përgjithshëm dhe zyrtar mbi pretendimet se Donald Trump është favorizuar në zgjedhje nga Moska. Hetimi synon të përcaktojë nëse këto ndërhyrje kanë ndikuar në rezultatin e dalë pas 8 Nëntorit.
