Të shtëna me armë ka pasur sot në qytetin e Burrelit. Mësohet se pesë të rinj janë përfshirë në një konflikt me njëri-tjetrin që ka degjeneruar në përdorimin e armëve të zjarrit.
Sipas Policisë, një automjet është afruar drejt një palestre në lagjen “Pjetër Budi” dhe prej saj është qëlluar me breshëri automatiku. Fatmirësisht ka pasur vetëm dëme materiale.
Objektiv mendohet të ketë qenë pronari i palestrës, B. S.
Policia dyshon se ngjarja ka pasur si motiv një sherr që djali i B. S., ka pasur me disa gjimnazistë. Këta të fundit janë identifikuar dhe janë në kërkim.
Njoftimi i Policisë
Rreth orës 13. 25 në sallën operative të Komisariatit të Policisë Mat ka ardhur një telefonatë se në Lagjen “Pjetër Budi” në qytetin e Burrelit ka të shtëna armësh. Menjëherë në drejtim të vendit që u dha informacioni shkuan shërbimet e policisë ku rezultoi se:
Në drejtim të bordurës së tarracës të ndërtesës (palestër) në pronësi të shtetasit B. S., është qëlluar me armë zjarri automatike. Nga të shtënat nuk ka asnjë person të lënduar dhe as dëme materiale në godinë pasi është qëlluar në drejtim të tarracës së godinës.
Nga veprimet e shpejta të kryera nga policia rezultoi se shkaku i këtij veprimi nuk ka lidhje me pronarin e palestrës por dyshohet për një konflikt për motive banale të djalit të tij B. S., gjimnazist me disa bashkëmoshatarë të tij. Policia po vijon veprimet për zbardhjen e plotë të rrethanave të ngjarjes si dhe për kapjen e 5 të rinjve si të përfshirë në këtë ngjarje konkretisht A. P., A. P., A. K., E. K., dhe M. H.
