Opozita, në ditën e Flamurit dhe Çlirimit të vendit, zhvilloi homazh edhe në monumentit e heroit të Kosovës, Adem Jashari, të vendosur në Tiranë.
“Kombi shqiptar bashkohet me 28 Nëntor në festë dhe në kujtesë të sakrificës shumëshekullore për Liri dhe Pavarësi që nga 28 Nëntori i Gjergj Kastrioti Skënderbeut, 28 Nëntori i Pavarësisë së Shqipërisë me Ismail bej Vlorën.
Dhe padyshim në këtë varg datash të rëndësishme, për ekzistencën, lirinë dhe pavarësinë e kombit shqiptar, ka edhe një 28 Nëntor tjetër për të cilën i falemi Zotit si shqiptar, ditëlindjen e komandantit legjendar të Ushtrisë Çlirimtare të Kosovës, Adem Jashari, para sakrificës së të cilit dhe para familjes Jashari përkulemi sot me nderim të thellë duke kujtuar për veten tonë dhe për brezat që vijnë se heronjtë që vendosin sakrificën sublime në altarin e lirisë dhe pavarësisë, nuk vdesin kurrë në zemrat e një kombi mirënjohës.
Lavdi përjetë Adem Jasharit!
Lavdi përjetë Dëshmorëve të Kombit!
Gëzuar 28 Nëntorin!”, u shpreh kreu i PD-së, Lulzim Basha, në përfundim të homazheve.
