Policia e Tiranës ka finalizuar operacionin e koduar “Situata”, duke zbardhur rrethanat e një konflikti të ndodhur rreth mesnatës së 11 gushtit në rrugën “Gjolekë Kokona”, ku u qëllua edhe me armë zjarri.
Në kuadër të hetimeve janë identifikuar 10 personat e përfshirë në konflikt. Katër prej tyre janë arrestuar, katër të tjerë janë proceduar në gjendje të lirë, ndërsa dy janë shpallur në kërkim.
Në pranga kanë rënë R. Z., 28 vjeç, K. K., 31 vjeç, S. F., 24 vjeç dhe R. F., 34 vjeç, të dyshuar për vepra të ndryshme penale, përfshirë përkrahjen e autorit të krimit, moskallëzimin e krimit dhe veprime që pengojnë zbulimin e së vërtetës.
Në kërkim janë shpallur F. F., 32 vjeç, i dyshuar për “Vrasje me dashje”, mbetur në tentativë, si dhe për armëmbajtje pa leje, dhe C. B., 32 vjeç, i dyshuar për moskallëzim krimi dhe përkrahje të autorit.
Sipas policisë, konflikti dyshohet se nisi pasi R. F. kishte fyer një të mitur 17-vjeçar. Pas kësaj, i riu dhe miqtë e tij janë konfliktuar fizikisht me R. F., vëllain e tij S. F. dhe persona të tjerë.
Më pas, 17-vjeçari dhe miqtë e tij kanë shkuar me motomjete pranë banesës së vëllezërve. Nga hetimet dyshohet se F. F. ka qëlluar me armë zjarri në drejtim të motomjeteve, por fatmirësisht nuk ka pasur persona të dëmtuar.
Në vendngjarje policia ka sekuestruar një thikë dhe sende të tjera që do t’i shërbejnë hetimit.
Policia vijon punën për kapjen e dy personave të shpallur në kërkim dhe dokumentimin e plotë të rrethanave të ngjarjes. Materialet procedurale i janë referuar Prokurorisë së Tiranës.
