Nënkryetari i Partisë Demokratike, Nikola Kedhi, ka reaguar për takimin e kryeministrit Edi Rama me kryetarët socialistë të bashkive në Kuç të Vlorës, ku është diskutuar reforma e re territoriale.
Kedhi tha se takimi, i paraqitur si konsultim, është shoqëruar me debate, kërcënime dhe përplasje, duke akuzuar Ramën se disa kryetarë bashkish janë nxjerrë jashtë mbledhjes.
Sipas tij, kjo qasje tregon se kryeministri nuk po zhvillon konsultime reale me pushtetin vendor, por kërkon të imponojë një vendim të marrë më herët.
“Ky nuk është konsultim. Konsultimi nuk bëhet për të bindur qytetarin për një vendim të marrë më parë. Konsultimi bëhet që mendimi i qytetarit të ndikojë te vendimi”, deklaroi Kedhi.
Ai tha se kundërshtimi ndaj reformës territoriale është rritur në disa zona të vendit, duke përmendur Poliçanin, Selenicën, Divjakën dhe Dimalin. Edhe këshilla bashkiakë kanë votuar kundër shkrirjes së bashkive.
Kedhi e akuzoi Ramën për përqendrim të pushtetit dhe presion ndaj komuniteteve, duke argumentuar se Partia Demokratike mbështet decentralizimin dhe një pushtet vendor më pranë qytetarëve.
Ai iu referua gjithashtu Kushtetutës dhe Kartës Europiane të Vetëqeverisjes Vendore, duke theksuar se ndryshimi i kufijve të njësive vendore kërkon konsultimin e komuniteteve të prekura.
“Problemi për Ramën nuk është reforma territoriale. Problemi është se, pas vitesh presioni, arrogancë dhe kontrolli absolut, njerëzit kanë filluar t’i thonë jo. Madje po i thonë jo edhe të tijtë”, tha Kedhi.a.b
