Është ndarë nga jeta Skënder Haluci, jurist, avokat dhe ish-kryetar i Gjykatës së Vlorës, një prej emrave të njohur të sistemit të drejtësisë dhe jetës publike shqiptare.
Gjatë karrierës së tij, Haluci ka mbajtur disa detyra të rëndësishme, mes tyre atë të kryetarit të Gjykatës së Vlorës dhe komisionerit pranë Avokatit të Popullit. Ai ushtroi për vite profesionin e juristit dhe avokatit, ndërsa ishte gjithashtu ish-i burgosur politik gjatë regjimit komunist.
Lajmi për ndarjen e tij nga jeta është bërë i ditur nga familjarët. Haluci ndodhej në bjeshkët e Tropojës, ku kishte shkuar për pushime me familjen. Mëngjesin e sotëm, ai u kishte thënë familjarëve se nuk ndihej mirë, ndërsa pak minuta më vonë është gjetur pa shenja jete.
Jeta e tij është shoqëruar edhe me një prej episodeve më të rënda të diktaturës komuniste. Në vitin 1983, Haluci dhe të afërm të tij u arrestuan me akuuën e agjitacion e propogandë, veprimtari armiqësore. Ai akuzohej ndër të tjera edhe për tentativë të vrasjes së Ramiz Alisë gjatë vizitës në Tropojë. Gjykata e dënoi atë me vdekje bashkë me kushëririn e tij Isuf Haluci.
Pak kohë pas vendimit, Presidiumi i Kuvendit Popullor e ndryshoi dënimin nga ekzekutimi në 25 vite burgim.
Pas viteve të burgimit politik, Haluci vijoi karrierën në fushën e drejtësisë. Në vitin 2020, ai u shkarkua nga sistemi i drejtësisë, vendim të cilin në atë kohë e cilësoi si një “dënim me vdekje” të dytë për të. a.b
