Një hetim i Prokurorisë së Shkodrës ka zbuluar se disa shefa departamentesh dhe studentë të Fakultetit Filologjik në Universitetin “Luigj Gurakuqi”, nëpërmjet disa personave që kryenin rolin e sekserëve, kanë krijuar një skemë korrupsioni në dhënien e provimeve, në vlera monetare që varionin nga 200 – 700 euro.
Në vijim të një hetimi disa mujor, të filluar në bazë të informacionit të Policisë, Prokuroria e Shkodrës ka marrë nga gjykata lejen për arrestimin e personave të përfshirën në veprimtarinë e paligjshme. Masat e sigurisë janë ekzekutuar gjatë mesditës së Hënë (data 21. 11. 2016) nga ana e forcave të Policisë Vendore.
Në kuadër të këtij procesimi penal, Prokuroria e Shkodrës ka zhvilluar hetimin proaktiv, në bazë të të cilit është zbuluar roli i personave, si edhe janë krijuar dyshimet e arsyeshme se ata bashkëpunonin me njëri-tjetrin, për të ndihmuar studentë të ndryshëm, në këmbim të parave, që të merrnin provimet, kryesisht në degën e Historisë.
Prokuroria e Shkodrës ka arritur të zbulojë se Zëvendësdekani i Fakultetit të Filologjisë dhe Shefi i Katedrës së Historisë, nëpërmjet sekserëve Vehbi Bala dhe Ndoc Deda, kanë marrë para nga studentë të ndryshëm. Në këmbim, pedagogët u kanë siguruar studentëve nota kaluese në provime të ndryshme ose vlerësime të larta, të cilat më pas do të shërbenin për regjistrimin në master.
Në bazë të veprimeve të deritanishme hetimore, gjykata e Shkodrës pranoi kërkesën e Prokurorisë dhe vendosi masën e sigurisë “arrest në burg” për personat, si më poshtë:
Të dyshuar për “korrupsion pasiv…”
1. Rokin Dabërdaku, pedagog, Zëvendësdekani i Fakultetit të Filologjisë
2. Simon Lufi, pedagog, Shef i Departamentit të Historisë
Të dyshuar për “Ushtrim ndikimit të paligjshëm”
3. Vehbi Bala (në rolin e sekserit)
4. Ndoc Deda (në rolin e sekserit)
Të dyshuar për “Korrupsion aktiv…”
5. Brunilda Allushi
6. Vehbi Allushi
7. Renato Trushi
8. Arsen Lekaj
