Vatikani shpalli sot 17 kardinalë të rinj, ndër ta edhe kardinali shqiptar Hirësia tij Ernest Troshani. Kardinalët e rinj vijnë prej 11 Kombeve të ndryshme nga mbarë bota.
Megjithëse i moshuar, kardinali i ri shqiptar, ishte i pranishëm në kremtimin e Konçistorit ku merrte pjesë edhe Ati i Shenjtë, Papa Françesku, me veshjen e kuqe, simbol i gjakut të martirëve e të popullit tonë, që ai e përfaqëson kësaj here para mbarë botës, në sheshin e Shën Pjetrit, në Vatikan.
Ndër 17 kardinalët e rinj, kardinali ynë, Hirësia e Tij, Ernest Troshani Simoni, tërheq në veçanti vëmendjen e opinionit publik, për qëndresën heroike që tregoi gjatë kalvarit të periudhës së komunizmit ateist. Ai simbolizon jo vetëm martirët, por mbarë një popull të persekutuar që, me besim në Zotin, doli ngadhënjimtar….
Kontinenti më i përfaqësuar në emërimet e reja, do të jetë ai evropian, me 5 kardinaj të rinj, i ndjekur nga Amerika Veriore (4), Afrika (3), Amerika Latine dhe Azia (2) e, së fundi Oqeania. Deri më sot ishin 7 kombet që nuk kishin asnjë kardinal: prej tyre, 4 do të kenë kardinaj me të drejtë zgjedhore (Republika Qendrafrikane, Bangladeshi, Ishujt Mauritius e Papua Guinea e Re) dhe 3, kardinaj me të drejtë këshillimore (Malajzia, Lesotho e Shqipëria). Kështu kolegji kardinalor i pas Koncistorit do të ketë 228 kardinaj, nga të cilët, 121 zgjedhës e 107 jo zgjedhës, 55 – të krijuar nga Papa Françesku (44 zgjedhës).
Kontinenti më i përfaqësuar mbetet Evropa, me 112 kardinaj (54 zgjedhës), ndjekur nga Amerika Veriore e Jugore, me 27 kardinaj (respektivisht 17 e 13 zgjedhës), nga Amerika Qendrore me 8 kardinaj (4 zgjedhës) e nga Oqeania, me 6 kardinaj (4 zgjedhës). Kolegjit Kardinalor i cili përbëhet nga një mori fytyrash, shpreh fytyrën e Kishës universale. E thekson këtë edhe prejardhja e kardinajve të rinj, përfaqësues të kontinenteve e të vendeve të ndryshme të botës
Papa Francesku shpall Kardinal Ernest Troshanin
