Policia e Shkodrës ka shpjeguar përmes një njoftimi rrethanat e dhunës së përdorur në një nga tregjet e qyteti t të Shkodrës mes shitësve të duhanit dhe zyrtarëve të policisë që merren me krimin ekonomik.
“Sot, në datë 11.11.2016 nga Drejtoria për Krimin Ekonomik e Financiar në bashkëpunim me Doganën Shkodër, në zbatim të planit operacional, është kërkuar mbështetje edhe nga Sektori i Krimit Ekonomik e Financiar në D.V.P-Shkodër me qëllim goditjen e kontrabandës me mallra që paguhet akcizë, kryesisht produktet e duhanit të grirë, të cilët kanë detyrim ligjor të pajisen me pullë fiskale nga Ministria e Financave.
Gjatë kontrollit të ushtruar për dokumentacionin përkatës në tregun e ngritur në vendin e quajtur “Rus”, Shkodër, disa tregëtarë nuk e dispononin atë dhe bënë rezistencë duke kundërshtuar me dhunë e goditur me sende të forta shërbimet e Policisë dhe ato të Doganës.
Gjatë këtij incidenti nuk ka pasur persona të lënduar, por vetëm dëme materiale në automjetet e Antikondrabandës së Doganës.
Ju bëjmë me dije se vazhdon kryerja e veprimeve hetimore në lidhje me këtë ngjarje me qëllim zbardhjen dhe dokumentimin e kësaj veprimtarie të paligjshme dhe në vënien para përgjegjësisë penale të autorëve të dyshuar.
Gjithashtu, Drejtoria e Standarteve Profesionale po verifikon edhe veprimet e punonjësve të Policisë gjatë ndërhyrjes”, theksohet ne njoftim.
