Protesta e 64-të kundër qeverisë së kryeministrit Edi Rama është shoqëruar me një tjetër aksion simbolik përpara godinës së Kryeministrisë. Pas përfundimit të fjalimeve, protestuesit kanë shkruar me germa të mëdha mbi asfalt frazën në anglisht “Boulevard of Hope” (“Bulevardi i Shpresës”), duke e shoqëruar këtë veprim me thirrje për ndryshim politik dhe dorëheqjen e kryeministrit.
Më pas, mijëra qytetarë nisën marshimin në rrugët kryesore të kryeqytetit, duke kaluar në zonën e Ish-Bllokut me pankarta në duar dhe brohoritje kundër qeverisë.
Gjatë marshimit u dëgjuan thirrje si “Edi Rama o tradhtar”, “Rama jep dorëheqjen!” dhe “Rama në burg, Berisha në burg!”, ndërsa protestuesit përsëritën kërkesën për dorëheqjen e kryeministrit dhe llogaridhënie nga klasa politike.
Përveç fjalimeve dhe marshimit, protesta u shoqërua edhe me pankarta me mesazhe ironike. Një nga mbishkrimet që tërhoqi më shumë vëmendjen ishte: “Ne thamë arresto Ballukun, jo liro Ilir Beqajn!”, duke iu referuar zhvillimeve të fundit që lidhen me drejtësinë dhe hetimet ndaj zyrtarëve të lartë.
Organizatorët kanë bërë të ditur se protestat do të vijojnë edhe në ditët në vijim, duke theksuar se mobilizimi nuk do të ndalet deri në përmbushjen e kërkesave të tyre.a.b
