Nis protesta kundër shkrirjes së Bashkisë Selenicë, banorët: “Selenica nuk mbyllet”
Dhjetëra qytetarë janë mbledhur mbrëmjen e së dielës te Monumenti i Drashovicës për të protestuar kundër propozimit për shkrirjen e Bashkisë Selenicë në kuadër të reformës së re administrativo-territoriale.
Me thirrjet “Selenica nuk mbyllet!” dhe “Larg duart nga Selenica!”, protestuesit shprehën kundërshtimin e tyre ndaj projektit, duke e cilësuar atë një vendim që nuk pasqyron interesat e komunitetit.
Sipas banorëve, protesta nuk ka të bëjë vetëm me ruajtjen e një njësie vendore, por edhe me mbrojtjen e identitetit, historisë dhe përfaqësimit të komunitetit në vendimmarrjen lokale. Ata argumentojnë se shkrirja e bashkisë do t’i largonte shërbimet publike nga qytetarët dhe do të dobësonte administrimin vendor.
“Bashkia është e qytetarëve dhe duhet të mbetet pranë tyre”, ishte një nga mesazhet kryesore të protestës.
Kundërshtimi i banorëve të Selenicës vjen në një kohë kur reforma administrativo-territoriale e propozuar nga mazhoranca ka nxitur reagime në disa bashki të vendit. Qytetarë dhe drejtues vendorë kanë kërkuar që mendimi i komuniteteve të merret në konsideratë përpara miratimit përfundimtar të hartës së re.
Protestuesit paralajmëruan se mobilizimi do të vijojë edhe në ditët në vijim, duke theksuar se do të kundërshtojnë çdo vendim që, sipas tyre, cenon ekzistencën e Bashkisë Selenicë.a.b
