Këngëtarja Era Istrefi ka dhënë një intervistë ekskluzive për faqen prestigjioze britanike “The Independent”.
“The Independent” shkruan për krahasimin që i bëhet Erës me Sian dhe Rihannën por nuk lë pa përmendur dhe suksesin e këngëtares me këngën mjaft të suksesshme “Bonbon”, ku deri më tani ka grumbulluar rreth 180 milion shikime në Youtube.
“Është kompliment i dashur të krahasohem me Sian dhe Rihannan. Më thonë se ‘ke shumë ngjashmëri me to’ dhe më kanë thënë ‘fëmijë i dy këngëtarëve’ dhe gjithçka tjetër. Por… është edhe sfidë e madhe. Sepse duhet nivel i lartë për të arritur atë që kanë arritur ato në karrierë. Por kjo më motivon të punoj shumë e më shumë çdo ditë!!”, ka thënë Era në këtë intervistë.
Era po ashtu ka thënë se është shumë krenare që talentet shqiptarë kanë pushtuar botën në vitin 2015.
“Askush nuk e ka menduar se do të ndodhë kjo… sidomos ne shqiptarët që kemi menduar gjithmonë se “nuk jemi të mirë sa duhet” për botën. Keq apo jo? Por tani jemi shumë të lumtur! Shumë e lumtur që jam një nga ato që theva limitet, sidomos që pata sukses me një këngë në gjuhën shqipe. Nuk besoj se kjo ka ndodhur më herët. Mund të jem e para që e kam bërë këtë”, ka thënë ajo.
