Konfliktet për zonat e shitjes së kokainës në doza të vogla, dyshohet se ka qenë edhe shkaku që policia të bie në gjurmët e tre të rinjve, që u arrestuan dje në rrugën “5 Maj” pranë “tregut të Medresesë” në kryeqytet.
Hetimet kanë nisur vetëm pak ditë më parë, pas një telefonate anonime se do të bëhej shkëmbimi i një sasie kokaine. Pas këtij informacioni, mësohet se janë angazhuar agjentët e antidrogës së drejtorisë së Tiranës, të cilët kanë identifikuar personat dhe mjetin me të cilin lëviznin të dyshuarit. Pasditen e djeshme, pas një ndjekje disa orësh, policia ka vendosur të ndërhy për arrestimin e tyre, vetëm pasi janë siguruar se lënda narkotike ndodhej në makinën e të dyshuarve.
Sipas policisë, në momentin e ndërhyrjes nga agjentët e policisë, njëri prej të dyshuarve ka nxjerr pistoletën që mbante me vete, duke i detyruar agjentët e vëzhgimit të qëllojnë në ajër për të neutralizuar tre të dyshuarve Sokol Geci, Eraldo Dodaj dhe Pashk Teska, të cilëve ju vendosen prangat. Gjatë kontrollit të mjetit tip “Ford” policia gjeti brenda kasës së mbulesës së boksit të marshit brenda kabinës së mjetit një qese, brenda të cilës ndodhej rreth 700 gram kokainë. Gjithashtu, policia njërit prej të dyshuarve i sekuestroi edhe armën model 54 të llojit TT.
Sipas policisë, tre të dyshuarit mendohet se janë shpërndarës të dorës së dytë, të cilët shpërndanin deri në 20 doza në ditë kundrejt 100 eurove doza. Materialet ndaj të dyshuarve janë dorëzuar në prokurori, e cikla pritet që brenda 48 orëve t’i përcaktojë rolet e gjithsecilit në këtë rrjet dhe ti nxjerrë para gjykatës së Tiranës për caktimin e masës së sigurisë ndaj tyre.
Sekuestrimi i 700 gramë kokainë, ja kush i spiunoi tre të arrestuarit
