Edhe një ditë pas reagimit zyrtar të Ministrisë së Brendshme, ndaj gazetës së ishdeputetit socialsit Kokëdhima, për raportin sekret për drogën, sot ka qenë vetë Ministri Saimir Tahiri, që në fjalën e tij, ka edhe me tej shtuar akuzat. Në një deklaratë për mediat, Tahiri e ka quajtur gjithë sa u publikua, një fabrikim dhe pjesë të llumit, që i shtohet akuzave të SHQUP-it edhe pse ato janë bërë nga një socialist.
“Është tentativë për të përbaltur punë e policisë. Tani përveç SHQUPit hyjnë edhe segmente të caktuara të medias, që kanë guximin të modifikojnë raporte që nuk ekzistojnë gjëkundi e synojnë përbaltjen e punës së policisë. Pallavrat që është mësuar ky cikël llumi në politikë dhe disa segmente të medias që nuk përputhen me interesat politike, personale dhe shpesh kriminale” tha Tahiri, pyetur për këtë çështje.
Edhe dje pas lajmit të publikuar nga gazeta “Shekulli” për ekzistencën e një raporti sekret të autoriteteve të huaja për gjendjen alarmante të implikimit të policisë në trafikun e drogës, ka reaguar ashpër Policia. Në një njoftim të këtij institucioni thuhet se lajmi është një sajesë e qëllimshme për të cënuar integritetin e policisë:
“Lidhur me lajmin e publikuar në Gazetën Shekulli e më pas marrë nga disa media, mbi egzistencën e një raporti sekret për kultivimin e drogës në Shqipëri, Policia e Shtetit sqaron opinionin publik se ky lajm është tërësisht i pavërtetë dhe një sajesë e qëllimshme për të cënuar integritetin e policisë dhe punën e saj. Theksojmë se është një lajm tërësisht i gënjeshtërt, për raporte të fabrikuara nga redaksi që kanë si synim vetëm përbaltjen e punës së policisë. Një raport i tillë nuk ka egzistuar kurrë e as egziston. Ky lajm i fabrikuar mbi egzistencën e një raporti tërësisht të sajuar, fsheh mbrapa interesa personale, politike dhe kriminale.
Policia e Shtetit bën me dije se do të ndjekë rrugën ligjore ndaj kujdo që prodhon , fabrikon dhe sajon shpifje të cilat synojnë prishjen e imazhit të policisë dhe të vendit.”thuhej në reagimin e Ministrise.
