Një Operacion antitrafik i përbashkët i Policisë së Shtetit dhe Guardia di Finanza është zhvilluar mbrëmjen e djeshme. Operacioni u finalizua në mbrëmje pas 6 orë ndjekje në det. Për pasojë është sekuestruar një skaf në ujërat italiane, me një sasi prej 533.5 kilograme lënde narkotike (të dyshuar si canabis sattiva), me dy shtetas italianë në bord.
Sipas burimeve të policisë shqiptare, mësohet se dje rreth orës 12.50, Qendra Ndërkombëtare Operacionale Detare në Durrës (QNOD), ka njoftuar për një mjet që lëvizte me shpejtësi nga perëndimi në drejtim të kepit të Rodonit.
Menjëherë u vunë në lëvizje mjetet lundruese të Policisë Kufitare dhe Migracionit, të Guardia di Finanzas, si dhe u njoftua INTERFORCA.
Ndjekja vazhdoi deri në ujërat ndërkombëtarë.
Në këtë kohë mjetet aeronautike dhe detare italiane të Guardia di Finanzas hynë në veprim dhe rreth orës 19.00 në momentin e hyrjes në ujërat italiane u identifikua dhe ndalua mjeti i lundrimit me dy persona në bord dhe me ngarkesën me lëndë narkotike prej 533.5 kilogramë.
Drejtuesit e mjetit ishin dy shtetas italianë A. M. 38 vjeç dhe A. C. 60 vjeç, te dy nga Brindisi
Dy skafistët u ndaluan ndërsa u sekuestrua edhe ngarkesën e cannabis sattivas.
