Zbulohen të tjera detaje nga punishtja e drogës e zbuluar në njësinë administrative Rukaj, në Mat.
Sipas të dhënave nga grupi hetimor, prej muajit prill të këtij viti, të paktën 50 punëtorë të ardhur nga zona të ndryshme ishin punësuar përgjatë lumit Kurvajë, në plantacionet e kanabisit, në segmentin Urakë-Rremull.
“Bosët” e ardhur nga rrethe të ndryshme të vendit kishin përgatitur gjithë infrastrukturën në lumin që vinte nga fshati Derjan dhe përfundonte në Liqenin e Ulzës. Por të hënën, dikush ka spiunuar kultivuesit e fshatit Rukaj për mbjelljen e mijëra bimëve narkotike në parcelat buzë lumit Kurvajë.
Ditën e hënë, në orët e pasdites, në Komisariatin e Policisë Mat ka mbërritur një telefonatë nga fshati Rremull, ku ka njoftuar se buzë lumit Kurvajë, kultivuesit kanë ngritur sera për pjekjen e bimëve narkotike, pasi mjegulla dhe temperaturat në rënie nuk mundësuan pjekjen e boçeve të bimës.
Aksioni u mbajt i fshehur nga Komisariati i Policisë Mat dhe Drejtoria Rajonale e Policisë Dibër, por tymi i ngritur mbi fshatrat e njësisë administrative nisi të dekonspironte gjithçka.
Sipas burimeve nga banorë të zonës, ka qenë një kultivues i ardhur nga Shkodra, i cili për efekt konkurrence ka filmuar parcelat me më shumë se 13 mijë rrënjë buzë lumit Kurvajë dhe këto filmime ia ka përcjellë Ministrisë së Brendshme.
Ky “konflikt” mes kultivuesve të bimëve narkotike ka vënë në lëvizje jo vetëm forcat e Komisariatit të Policisë Mat, por edhe Forcat e Ndërhyrjes së Shpejtë të ardhur nga Tirana.
