Rikthimin e neneve të ligjit për importin e plehrave në Shqipëri, për deputeten Mimoza Hafizi është një pabesi e qeverisë ndaj qytetarëve. Në një deklaratë për mediat, Hafizi tha se nenet që u hodhën poshtë 3 vjet më parë, tashmë po rikthehen përsëri dhe sipas saj kjo demotivon mbledhjen dhe shfrytëzimin e mbeturinave shqiptare.
“Ky projektligj synon lejimin e importeve të plehrave në Shqipëri përmes disa neneve që janë hedhur poshtë 3 vite më parë në ligjin e 10 tetorit 2013. Unë i mbetem të gjitha argumenteve me të cilat kjo mazhorancë e ndaloi importin e plehrave tre vjet më parë. Ka një argument të fortë politik, ligji i tre viteve më parë e bëri të pamundur zhvillimin e një referendumi, i cili ishte kërkuar përmes 65 mijë firmave dhe meqë ligji e hodhi poshtë importin e plehrave atëherë referendumi u konsiderua i panevojshëm. Prandaj fakti që ne rikthejmë nenet e ligjit kjo është një pabesi dhe mosbesim që kjo qeveri dhe mazhornacë kërkon të tregojë ndaj qytetarëve.
Ne jemi në diskutim edhe në shoqërinë civile, kam bërë një kërkesë në FB që edhe qytetarët të jenë të interesuar. Importi i plehrave prek pasurinë tonë të përbashkët, prek shëndetin e qytetarëve, por edhe demotivon mbledhjen e mbeturinave shqiptare, që nëse mblidhen në mënyrë të zgjuar ato kthehen nga burim pengesë në burim zhvillimi. Nëse kërkojmë të importojmë plehra nga jashtë do demotivojmë mbledhjen dhe shfrytëzimin e mbetjeve shqiptare”, u shpreh Hafizi.
Mimoza Hafizi: Rikthimi i ligjit për importin e plehrave, pabesi ndaj qytetarëve
