Pjesë e punës së Drejtorisë Rajonale e Punësimit në Korçës, janë përpjekjet e saj për t’u ardhur në ndihmë kategorisë
punëkërkues të papunë. Në funksion të kësaj është edhe puna për formimin profesional të punëkërkuesve nëpërmjet projekteve të ndryshme institucionale.
Për këto projekte flet Florenc Tabaku, drejtor i Drejtorisë Rajonale të Punësimit.
Cilat do të jenë projektet e punësimit në vijim?
Mjaft të rëndësishëm vlerësojmë bashkëpunimin e Zyrës Rajonale të Punësimit, me Qendrën e Formimit Profesional dhe “Dorkas Albania”, ndërsa për vitet 2015-2018 kemi një projekt 3-vjeçar, ku aspekti më i rëndësishëm i këtij projekti do të jetë përmirësimi i infrastrukturës së Qendrës të Formimit Profesional. Infrastruktura do të jetë moderne në përshtatje me tregun e punës. Po kaq të rëndësishme mbeten edhe përmirësimet e curriculave të shkollave profesionale dhe të Qendrës së Formimit Profesional. E veçanta e këtij projekti është pjesëmarrja e përfaqësuesve të bisnesit si një dëshirë e tyre në realizimin e këtij projekti, të cilët kanë sjellë përvojën dhe idetë e tyre. Projekti në fjalë synon që kurset e punëkërkuesve të papunë të kryhen me curricula bashkëkohore dhe infrastrukturë moderne, me qëllim që nga këto programe ata të marrin më të mirën e mundshme dhe aftësimin real për të qenë i gatshëm në tregun e punës.
Ndërkohë, ndryshime ka pësuar edhe ligji për pagesat e papunësisë, ku konsistojnë këto ndryshime?
Po, ndryshime ka pësuar edhe ligji për pagesat e papunësisë. Më përpara përfitonin një vit pagesë papunësie të gjithë personat, të cilët mbeteshin të papunë si rezultat i shkurtimit të vendeve të punës, të mbylljes apo ristrukturimit, por tashmë gjithçka varret nga masa e kontributit. Personat që kanë deri në 5 vjet kontribut, sigurime shoqërore dhe shëndetësore, përfitojnë 3 muaj pagesë papunësie, ata që kanë të siguruara deri në 10 vjet përfitojnë 9 muaj pagesë papunësie, dhe personat që kanë mbi 10 vjet kontribut të sigurimeve shoqërore dhe shëndetësore përfitojnë një vit pagesë papunësie. Pra gjithçka varet nga masa e kontributit.
VENDE TË LIRA PUNE
(Gjithsej 89 vende të lira pune)
1. Përpunimi i produkteve ushqimore, pijeve dhe produkteve të duhanit 15 vende të lira pune.
2. Përpunimi i tekstileve, konfeksionimi i veshjeve dhe prodhimi i lëkurës dhe produkteve prej lëkure 59 vende të lira pune.
3. Prodhimi i drurit dhe produkteve prej druri, i letrës dhe i produkteve prej letrës, shtypshkrimet 3 vende të lira.
4. Industri të tjera përpunuese, 1 vend i lirë pune.
5. Tregu me shumicë dhe pakicë, riparim i automjeteve dhe biçikletave 5 vende të lira pune.
6. Akomodimi dhe shërbimi ushqimor 6 vende të lira.
