Çarja e koalicionit të majtë, tani nuk është fare e vështirë për tu kuptuar. Deklarata e djeshme e Ilir Metës, ishte sinjali i parë, ndërkohë që ajo që ka ndodhur sot në Komisionin e Ligjeve duket se i’a vë ‘vulën’ dhe nuk ka më kthim pas.
Gazeta “Panorama” raporton se në mbledhjen e sotme të Komisionit atmosfera në komision ishte shumë e zymtë, larg zhurmës dhe batutave të humorit që jemi mësuar të shohim. Deputetët e PSsë dhe LSIsë nuk kanë komunikuar fare me njeri tjetrin gjatë kësaj mbledhje, ndërkohë që në tension është dukur edhe kryetari i Komisionit, Fatmir Xhafaj. Ai ka dalë disa herë nga mbledhja e Komisionit duke e lënë atë pa drejtues dhe ka bërë telefonata të gjatë.
Ndërsa ministri i Drejtësisë, Ylli Manjani, përfaqësues i LSIsë, është larguar në mes të mbledhjes teksa po mbronte një ligj për përmbarimin gjyqësor. Manjani është justifikuar me faktin se i kishte dalë një urgjencë.
