Biznesmeni Luan Muçaj ka reaguar pas ngjarjes së ndodhur në Orikum, ku është përfshirë në një përplasje me biznesmenin Vasil Bedinaj. Muçaj ka dhënë versionin e tij për konfliktin, duke pretenduar se është kërcënuar dhe se persona të armatosur kanë qëlluar me armë ndaj tij dhe familjarëve të tij.
Muçaj ishte ndaluar për 72 orë pas konfliktit me Vasil Bedinaj, ndërsa Kryeministri Rama ka vendosur të shtetëzojë atë pronë.
Në një deklaratë për mediat, Luan Muçaj thotë se prej vitit 2019 ka investuar në zonën e Palasës, ku sipas tij ka blerë nga pronarë vendas rreth 97 mijë metra katrorë tokë.
Ai shprehet se më 15 korrik 2021 ka marrë statusin e investitorit strategjik, mbi bazën e një projekti të hartuar nga studioja ndërkombëtare EEA (Emre Arolat Architecture).
Sipas Muçajt, në vitin 2022 ka aplikuar për lejen e fazës së parë të ndërtimit të një hoteli me brand ndërkombëtar, me pesë yje, ndërsa në vitin 2024 ka zbardhur lejen dhe ka nisur punimet. Po në vitin 2024, ai thotë se ka aplikuar për fazën e dytë të projektit.
Biznesmeni tregon se kishte mësuar përmes rrjeteve sociale se ishte dhënë një leje ndërtimi në tokën që pretendon se ka blerë dhe mbi të cilën ishte dhënë statusi i investitorit strategjik.
Pas kësaj, ai thotë se iu drejtua Agjencisë së Zhvillimit të Territorit (AZHT), ku sipas tij u njoftua se do të verifikoheshin dokumentet e palëve dhe se deri në përfundimin e verifikimeve nuk do të bëhej zbardhja e lejes së ndërtimit.
Më pas, sipas deklaratës së tij, është telefonuar nga Vasil Bedinaj, i cili i ka kërkuar të mos i ekspozonte në AZHT pretendimet lidhur me pronën.
“Gjatë kësaj telefonate, u vendos që të takoheshim në Orikum, te hoteli i z. Bedinaj, për të diskutuar rreth kësaj situate”, shprehet Muçaj.
Ai tregon se Bedinajn e kishte njohur rreth një vit më parë, kur ky i fundit ishte paraqitur në kantierin ku po ndërtonte në Palasë, duke kërkuar takim lidhur me disa pretendime për kufirin e pronës.
Sipas Muçajt, në atë rast Bedinaj nuk kishte qenë vetëm, por i shoqëruar nga disa persona të armatosur.
Për takimin në Orikum, biznesmeni thotë se ka shkuar i shoqëruar nga familjarë të tij. Ai pretendon se, sapo nisi t’i shpjegonte Bedinajt pretendimet e tij, situata u tensionua.
“Sapo kam nisur t’i shpjegoj pretendimet e mia, z. Bedinaj e ka tensionuar situatën me pretendimet e veta, duke sharë dhe ofenduar”, deklaron ai.
Më tej, Muçaj pretendon se Bedinaj ka thirrur persona të armatosur, të cilët, sipas tij, ndodheshin në vende të ndryshme të ambienteve.
“Duke dalë nga ambientet e z. Bedinaj, njerëzit që ai thirri qëlluan me armë ndaj nesh”, pretendon biznesmeni.
Ai i ka kërkuar Policisë së Shtetit që të hetojë ngjarjen dhe të identifikojë personat që, sipas tij, kanë qëlluar me armë.
Në deklaratë, Muçaj akuzon gjithashtu Bedinajn se ka manipuluar opinionin publik përmes pamjeve filmike dhe lajmeve që, sipas tij, nuk kanë pasqyruar të gjithë situatën.
Ai kundërshton edhe pretendimet se i kishte vendosur gjobë Bedinajt, duke i cilësuar ato si të pavërteta.
“Fantazia e gjobës ndaj një personi me pantallona të shkurtra, i cili rrihet çdo vit me ndonjë turist, polic apo plazhist, është një fantazi dashakeqe e një grupi personash që mendojnë se, duke vjedhur pronat e të tjerëve, mund të bësh edhe para, të dalësh edhe burrë i mirë dhe të quhesh biznesmen”, shprehet ai.
Në fund të deklaratës, Luan Muçaj thotë se është i gatshëm të vërë në dispozicion të mediave dhe opinionit publik dokumentet që lidhen me pretendimet e tij.
Deklarata përfaqëson versionin e Luan Muçajt për ngjarjen, ndërsa rrethanat e përplasjes dhe pretendimet e palëve pritet të verifikohen nga organet ligjzbatuese.r.k
