Foto Ilustruese
Shërbimet e Policisë Kufitare të Kapshticës, në bashkëpunim me Doganën dhe me Specialistët e Seksionit kundër Narkotikëve të DVP- Korçë goditën një rast të trafikut ndërkombëtar të lëndëve narkotike. Për pasojë mësohet se u bë arrestimi në flagrancë i Renis Kasapi, 32 vjeç, banues në fshatin Karbunar, të rrethit Lushnjë. Ndërkohë mësohet se filloi procedimi penal në gjendje të lirë ndaj shtetases S. C., 21 vjeç, banuese në Kombinat, Tiranë pasagjere në mjet.
Bllokimi i lëndës narkotike u bë nga shërbimet e Policisë Kufitare në vijën e dytë, të cilët Përzgjodhën për kontroll të detajuar një automjet pasi krijuan dyshime për trafik të lëndëve narkotike.
Burimet zyrtare të policisë saktësuan se gjatë kontrollit të detajuar nga Policia Kufitare, përfshi edhe procesin e skanimit të kryer nga Dogana, në automjetin tip “Mercedes-Benz”, me targa AA 049 NF, që drejtohej nga shtetasi Renis Kasapi, në shasi, në një vend të përshtatur janë gjetur dhe sekuestruar në cilësinë e provës materiale, 40 (dyzetë) pako të mbështjella me natriban me një peshë 20 kg lëndë narkotike e presuar e dyshuar si cannabis sattiva.
Gjithashtu u sekuestruan 3 aparate celular, shuma prej 1150 Euro si edhe automjeti ku u gjet lënda narkotike.
Materialet për hetime të mëtejshme, i kaluan Prokurorisë të Krimeve të Rënda në Tiranë, për veprën penale: “Trafikimi i narkotikëve” kryer në bashkëpunim, parashikuar nga neni 283/a/2 i Kodit Penal.
