Grupi parlamentar i PD ka vendosur të bllokojë seancën e nesërme parlamentare nëse nuk merren parasysh nga mazhoranca kërkesat e saj. Në konferencën ku marrin pjesë kryetari i Kuvendit, kryetarët e grupeve parlametnare dhe ata të komisioneve të përhershme, që është parashikuar të mblidhet paraditen e nesërme (e enjte), pak para se të nisë seanca parlamentare, PD-ja do të kërkojë futjen në rendin e ditës për votim të ndryshimeve ligjore të dekriminalizimit si dhe miratimin po në të njëjtën seancë të ndërprerjes së mandatit të Koço Kokëdhimës, Valentina Leskajt dhe Rakip Sulit. Tre deputetët sipas PD-së kanë shfrytëzuar postin e tyre dhe kanë marrë kontrata nga shteti në emër të familjarëve.
Gjithashtu një kërkesë tjetër e PD është miratimi me shpejtësi i akteve nënligjore të dekriminalizimit. Për ta bërë këtë, opozita propozoi ndryshimin e ligjit të dekriminalizimit, i cili hyri në fuqi pak javë më parë dhe që, sipas përcaktimit ligjor, duhet të nisë nga zbatimi më 6 mars.
Propozimi i opozitës vendos në shënjestër deputetin Armando Prenga dhe synon pezullimin e ushtrimit të funksionit të tij, derisa ai të marrë pafajësi. Ndryshimi i ligjit nuk përmend emra, por përmban qartë rrethanën, në të cilën u ndalua Armando Prenga, arrest në flagrancë, dhe dy prej veprave penale për të cilat ai akuzohet: “plagosje e lehtë me dashje” dhe “kanosje”.
Vepra që përfshihen te kapitulli i krimeve kundër jetës. Largimi i Armando Prengës nga Parlamenti është një nga kushtet kryesore, që opozita, -siç thotë kryetari i saj, – të mos detyrohet të bllokojë funksionimin normal të. Parlamentit.
Megjithëse ligji për dekriminalizimin, derisa u miratua në fund të vitit të shkuar kaloi në një proces të vështirë politik me ndërmjetësim ndërkombëtar, ai është një nga ligjet e miratuara me konsensus mes qeverisë dhe opozitës.
